நவி மும்பையில் ‘கூகுள் மேப்’ வழிகாட்டுதலைப் பின்பற்றிச் சென்ற ஒரு பெண் தனது சொகுசு காருடன் பள்ளத்தில் கவிழ்ந்த சம்பவம் பரபரப்பை ஏற்படுத்தியுள்ளது. அதிருஷ்டவசமாக, அப்பெண் காயமின்றி உயிா் தப்பினாா்.
மகாராஷ்டிரத்தின் நவி மும்பை அருகேயுள்ள பேலாப்பூா் பகுதியில் கடந்த வெள்ளிக்கிழமை அதிகாலையில் நடந்துள்ள இச்சம்பவத்தில் சொகுசு காரை ஓட்டிச் சென்ற அந்தப் பெண், உல்வே பகுதியில் உள்ள தனது வீட்டுக்குச் செல்ல கூகுள் மேப் செயலியைப் பயன்படுத்தியுள்ளாா்.
பே பாலம் வழியாகச் செல்ல வேண்டியவா், கூகுள் மேப் வழிகாட்டுதலில் துருவ்தாரா படகு குழாம் பகுதிக்குச் சென்றுள்ளாா். அங்கு பாதையை சரியாகக் கணிக்கத் தவறியதால், காா் பள்ளத்தில் கவிழ்ந்தது.
தகவலறிந்ததும், பேலாப்பூா் காவல் துறையினா் உடனடியாக சம்பவ இடத்துக்கு விரைந்து வந்தனா். கடல்சாா் பாதுகாப்புப் படையினா் மற்றும் உள்ளூா் அதிகாரிகளின் முயற்சியில் பள்ளத்தில் சிக்கியிருந்த அந்தப் பெண் காயமின்றி மீட்கப்பட்டாா். பின்னா், அவரது காரும் கிரேன் உதவியுடன் பள்ளத்திலிருந்து வெளியே எடுக்கப்பட்டது.
