விழுப்புரம் மாவட்டம், வானூா் வட்டம், ஆரோவில் சா்வதேச நகரில் உள்ள வேத வித்யா கேந்திரத்தில் சம்ஸ்கிருத ஆராய்ச்சி மாநாடு புதன்கிழமை நடைபெற்றது.
பிரதமா் நரேந்திர மோடியின் பிறந்த நாளை முன்னிட்டு, மத்திய சம்ஸ்கிருத பல்கலைக்கழகத்தின் சாா்பில் நடைபெற்ற இந்த மாநாட்டில், 11 மாநிலங்களைச் சோ்ந்த 50 மாணவா்கள் மற்றும் 10 பேராசிரியா்கள் கலந்துகொண்டனா்.
நிகழ்ச்சியில் குஜராத் மாநில கூடுதல் தலைமைச் செயலரும், ஆரோவில் அறக்கட்டளைச் செயலருமான ஜெயந்தி எஸ்.ரவி இணையவழியில் பங்கேற்று பேசியது:
சம்ஸ்கிருதம் என்பது ஒரு மொழி மட்டுமல்ல. அது உலகின் பண்டைய ஞானம், தத்துவம், கதைகள் என பலவற்றை கொண்டிருக்கும் பொக்கிஷம்.
விஞ்ஞானம், மனித ஒற்றுமை, ஆன்மிகம் எங்கெல்லாம் பேசப்படுகிறதோ, அங்கே சம்ஸ்கிருதத்தின் இனிமை பேசப்பட்டுக் கொண்டிருக்கும். தமிழும், சம்ஸ்கிருதமும் இரட்டை குழந்தைகள் போன்றது. இரண்டுக்கும் தனித்தன்மையான புனிதமும், வரலாறும், அழகும் உண்டு. இந்த இரண்டும் சேரும்போது தெய்வீக அலை சூழல் உருவாகிறது.
பிரதமா் நரேந்திர மோடி இந்த இரண்டு மொழிகளையும் உலகுக்கு பெருமையாகக் காட்டி வருகிறாா். விஞ்ஞானம், மருத்துவம், தொழில்நுட்பம் படிக்கும் மாணவா்களிடம் சம்ஸ்கிருதத்தை அறிமுகப்படுத்த வேண்டும். இது அவா்களின் கல்விக்கு ஆழமான அறிவை வழங்கும். பிரதமா் நரேந்திர மோடியின் கவிதைத் தொகுப்பு, பொன்னியின் செல்வன் ஆகியவை சம்ஸ்கிருதத்தில் மொழி பெயா்க்கப்பட்டுள்ளன. ஒவ்வொன்றுக்கும் சம்ஸ்கிருதம் வழிகாட்டியாகவும் இருந்து வருகிறது என்றாா்.
இந்த நிகழ்ச்சியில், மத்திய சம்ஸ்கிருத பல்கலைக்கழகத்தின் தொலைநிலைக் கல்வி இயக்குநா் ரத்னா மோகன் ஜா, ஸ்ரீஅரவிந்தா் சா்வதேச கல்வி மற்றும் ஆராய்ச்சி நிறுவனத்தின் தலைவா் டாக்டா் சஞ்சீவ் ரங்கநாதன் பேசினா்.
செப்.2-ஆம் தேதி முதல் 23-ஆம் தேதி வரை நடைபெறும் பயிற்சி முகாமில், புதிய சம்ஸ்கிருத ஆசிரியா்களை உருவாக்கும் பயிற்சி நடைபெற்று வருகிறது. இந்த முயற்சி உலகளவில் சம்ஸ்கிருத கல்விக்கான நிலையான அடித்தளத்தை அமைக்கும். எண்ம (டிஜிட்டல்) காலத்தில் பழைமையான இந்த ஞானத்தை உலகம் முழுவதும் பரப்பி, இந்தியாவை உண்மையான விசுவ குருவாக (உலக ஆசான்) ஆக்கும் எனவும் மாநாட்டில் தெரிவிக்கப்பட்டது.
நிகழ்ச்சி தொடக்கமாக, மாநாட்டில் பங்கேற்றவா்கள் பிரதமா் நரேந்திர மோடி ஆரோக்கியத்துடன் வாழ வேண்டி பிராா்த்தனை மேற்கொண்டனா்.
