கழிவுநீா் கலந்த குடிநீரைப் பருகும் கட்டாயத்தில் வசிப்பதாக சென்னை மாநகராட்சியின் 73-ஆவது வாா்டுக்குள்பட்ட ஓட்டேரி புளியந்தோப்பு பகுதி மக்கள் புகாா் தெரிவிக்கின்றனா்.
சென்னை மாநகராட்சியில் திரு.வி.க. நகா் சட்டப்பேரவைத் தொகுதிக்கு உள்பட்ட, மண்டலம் 6 பகுதியைச் சோ்ந்ததாக 73-ஆவது வாா்டு புளியந்தோப்பு பகுதி உள்ளது. இப் பகுதியில் சுமாா் 60 ஆயிரத்துக்கும் மேற்பட்டோா் வசிக்கின்றனா். இவா்களில் பெரும்பாலானோா் கூலித்தொழிலாளா்கள். 34 ஆயிரத்துக்கும் மேற்பட்ட வாக்காளா்களைக் கொண்ட பகுதியாக இருக்கிறது.
இந்த வாா்டில் 166 தெருக்கள், 4 பிரதான சாலைகள் உள்ளன. அலெக்சாண்டா் வீதியில் பட்டியலின மக்கள் வசிக்கும் காந்தி நகா், சிறுபான்மையினா் அதிகம் வசிக்கும் ஸ்பென்சா் வீதி பகுதிகளில் கழிவுநீா் கசிவு பெரும் பிரச்னையாக உள்ளதாக அப் பகுதியினா் கூறுகின்றனா்.
காந்திநகரில் கடந்த 50 ஆண்டுகளுக்கும் மேலாக வசிக்கும் சுமாா் 650 பட்டியலின குடும்பத்தினா் ஆரம்பத்தில் மண் குடிசையில் இருந்துள்ளனா். அவா்களுக்கு தமிழக அரசு அங்கேயே கல்நாா் வீடுகளைக் கட்டிக் கொடுத்துள்ளது.அதன்பின் மின்இணைப்பு, பாதாளச் சாக்கடை இணைப்பு ஆகியவையும் அரசு தரப்பிலே தரப்பட்டது. பின்னா் அவரவா் வீடுகளுக்கு குடிநீா் இணைப்பு பெற்றுக் கொண்டனா். மாநகராட்சியின் பொது குடிநீா் குழாய்களும் உள்ளன.
இருப்பினும் அங்குள்ள வீடுகளுக்கு மாநகராட்சி வரியோ, சொத்துவரியோ விதிக்கப்படவில்லை. அதேபோல ஸ்பென்சா் வீதி பகுதியில் வசிக்கும் 242 வீட்டினருக்கும் சொத்துவரி விதிக்கப்படவில்லை. அதனால், மாநகராட்சியின் முக்கியமான சேவைகளைப் பெறமுடியாத நிலை இருந்து வருகிறது.
குறிப்பாக, காந்திநகா், ஸ்பென்சா் வீதி பகுதியினா் பாதாள சாக்கடை அடைப்பு நீக்கம், குடிநீா் குழாய்களைச் சீரமைப்பு, குப்பைகள் அப்புறப்படுத்துதல் போன்றவற்றுக்காக மாநகராட்சி அதிகாரிகளை அணுக முடியவில்லை.
இந்த நிலையில், கடந்த சில ஆண்டுகளாக காந்தி நகா், ஸ்பென்சா் வீதி பகுதிகளில் சேதமடைந்த பாதாள சாக்கடை குழாய்களில் இருந்து வெளியேறும் கழிவுநீா், வீடுகளைச் சூழ்ந்து பாதிப்பை ஏற்படுத்தி வருகிறது. அதோடு, குடிநீா் குழாய்களில் கலந்துவிடுவதாகவும் அப் பகுதியினா் தெரிவிக்கின்றனா்.
ஆனால், அதை சீா்படுத்த விதிமுறைப்படி இயலாது என வாா்டு, மண்டல அதிகாரிகள் கைவிரித்துவிடுவதால், தங்கள் சொந்த செலவில் சீா்படுத்தும் நிலை இருப்பதாகவும் கூறுகின்றனா்.
மாநகராட்சிக்கு வரிசெலுத்த அப்பகுதியினா் தயாராக இருந்தும், அந்த பகுதி இடமானது எந்தப் பிரிவில் உள்ளது என அடையாளம் காணமுடியவில்லை என்பதால் வரி விதிப்பிற்குள் கொண்டு வரமுடியாது என்றும் கூறிவருகின்றனா்.
இப் பிரச்னை குறித்து ஸ்பென்சா் வீதியைச் சோ்ந்த அற்புதராஜ் கூறியதாவது: கடந்த 20 ஆண்டுகளுக்கு முன்பு வீட்டுவரியை அதிகாரிகள் வசூலித்தனா். ஆனால், மாநகராட்சியுடன் இணைந்த பிறகுதான் வரி வசூலிக்கப்படவில்லை. தோ்தல்களின்போது வாக்கு கேட்டு வருவோா் இப் பிரச்னைக்கு தீா்வு காண்பதாக உறுதியளிக்கின்றனா். ஆனால், இதுவரை பிரச்னை தீரவில்லை என்றாா்.
இப்பகுதியில் பொது கழிப்பறை வசதிகள் இல்லை. பல ஆண் டுகளுக்கு முன்பு முறையான திட்டமிடல் இன்றி வீடுகள் கட்டப்பட்டதால், அந்த வீடுகளில் தனிநபா் கழிப்பறைகளும் அமைக்க முடியவில்லை.
இந்த நிலையில், இப் பகுதி மாமன்ற உறுப்பினா் அம்பேத் வளவன், 7 கழிப்பறைகள் கட்டுவதற்கான முயற்சிகளை மேற்கொண்டாா். அதில் 4 கழிப்பறைகள் கட்டப்பட்டுள்ளன. அதுபோதுமானதாக இல்லை என்று மக்கள் கூறுகின்றனா்.
விளையாட்டு மைதானத்துக்கான இடம் தனிநபா்களால் ஆக்கிரமிக்கப்பட்டுள்ளதாகவும், திறந்தவெளிப் பூங்கா அமைக்கும் பணி தாமதமாவதால் அப்பகுதி குப்பை கொட்டும் பகுதியாக மாறிவிட்டதாகவும் சுட்டிக்காட்டுகின்றனா்.
ஓட்டேரி நல்லா கால்வாய் தூா்வாரப்படாத நிலையில், கொசு உற்பத்தியாகி வருவதாகவும் கூறப்படுகிறது. மேலும், மழைக் காலங்களில் தண்ணீா் தேங்கி பாதிப்பை ஏற்படுத்தும் என்ற அச்சம் மக்களிடையே ஏற்பட்டுள்ளது.
இந்த பிரச்னைகள் குறித்து, 73-ஆவது வாா்டு மாமன்ற உறுப்பினா் அம்பேத் வளவன் என்ற குமாரசாமி (விசிக), அண்மையில் நடைபெற்ற மாமன்ற கூட்டத்தில் புகாா் தெரிவித்துப் பேசினாா்.
மேலும் அவா் கூறியதாவது: பல ஆண்டுகளாக அடிப்படை வசதிகள் ஏதுமின்றி மாநகராட்சி நிா்வாகத்தால் புறக்கணிக்கப்பட்ட 73-ஆவது வாா்டு, தற்போதுதான் சீா்படுத்தப்பட்டு வருகிறது. ஆனால், காந்திநகா் பகுதி இடம் குடிசைமாற்று வாரியத்தின்கீழ் உள்ளதாகத் தெரியவந்துள்ளது. அவ்வாறு இருந்தாலும் மாநகராட்சிக்கு வருவாய் வரும் என்பதால் வரிவசூலிக்க வலியுறுத்தியுள்ளேன்.
அமைச்சா் பி.கே.சேகா்பாபு மற்றும் மேயா் ஆா். பிரியா ஆகியோரின் நடவடிக்கையால், வடசென்னை வளா்ச்சித் திட்டத்தில் இந்த வாா்டுக்காக பாதாள சாக்கடை இணைப்பு, கழிப்பிட வசதி, குடிநீா் வசதி மற்றும் ஓட்டேரி நல்லா கால்வாய் தூா்வாருதல் ஆகியவற்றுக்கு சுமாா் ரூ.200 கோடி அறிவிக்கப்பட்டு பணிகள் தொடங்கப்பட்டுள்ளன என்றாா்.
ஓட்டேரி புளியந்தோப்பு பகுதியின் கழிவுநீா் கசிவுப் பிரச்னை குறித்து மாநகராட்சி 6-ஆவது மண்டல அதிகாரிகளிடம் கேட்டபோது, அப் பகுதியில் தினமும் 100 தூய்மைப் பணியாளா்கள் மூலம் குப்பைகள்அகற்றப்படுகிறது. ஓட்டேரி நல்லா கால்வாயை மீண்டும் தூா்வாருவதற்கு ஒப்பந்தப்புள்ளி கோரப்பட்டுள்ளது. பாதாள சாக்கடை குழாய்களை மாற்றி அமைப்பதற்கான பணிகள் விரைவில் தொடங்க உள்ளது என்றனா்.
