"நானும் தோனியும்தான்…" – 2011 உலகக் கோப்பையில் யுவராஜ் தேர்வானது பற்றி மனம் திறந்த கேரி கிர்ஸ்டன்!

தோனி தலைமையிலான இந்திய அணி யுவராஜ் சிங் இல்லாமல் 2011-ல் சொந்த மண்ணில் ஒருநாள் உலகக் கோப்பையை வென்றிருக்குமா என்றால் நிச்சயம் வாய்ப்பில்லை அல்லது கடினம் என்பதுதான் அதற்கான பதிலாக இருக்கும்.

அந்தத் தொடரில் பேட்டிங், பவுலிங் என ஆல்ரவுண்டராக ஜொலித்த யுவராஜ் சிங்தான் தொடர் நாயகன் (15 விக்கெட், 362 ரன்கள்) விருதையும் வென்றார். அவர் விளையாடிய கடைசி ஒருநாள் உலகக் கோப்பை தொடரும் அதுதான்.

ஆனாலும், அவருக்குப் பிறகு பேட்டிங், பவுலிங், ஃபீல்டிங் என மூன்றையும் ஒன்றாகக் கொண்ட இடது கை வீரரை இந்தியா பெறவில்லை.

இந்த நிலையில், 2011 உலகக் கோப்பையில் யுவராஜ் சிங்கைத் தேர்வு செய்தது குறித்து அப்போதைய இந்திய அணியின் தலைமைப் பயிற்சியாளர் கேரி கிர்ஸ்டன் மனம் திறந்திருக்கிறார்.

rediff ஊடகத்திடம் இதனைப் பகிர்ந்த கேரி கிர்ஸ்டன், “நல்லவேளை யுவராஜை நாங்கள் தேர்வு செய்தோம். ஏனெனில், கடைசி நேரத்தில் அவரை எடுக்கலாமா வேண்டாமா என்று நெருக்கமான பேச்சு இருந்தது.

அவ்வளவு எளிதில் அவர் அணியில் இடம்பெறவில்லை. ஆனால், அவரைத் தேர்வு செய்ய தோனியைப் போலவே நான் ஆர்வமாக இருந்தேன்.

ஏனெனில் அவருக்கு அவ்வளவு அனுபவம் இருந்தது. இறுதியில் உலகக் கோப்பை எவ்வாறு நிறைவடைந்தது என்று உங்களுக்கே தெரியும்.

யுவராஜை நான் எப்போதும் விரும்புவேன். எங்களுக்குள் நல்ல உறவு இருந்தது. சில சமயங்களில் ஏமாற்றமளிப்பார், ஆனாலும் அவரைப் பிடிக்கும்.

அவர் எப்போதும் ரன்கள் அடிக்க வேண்டும் என்று நான் விரும்புவேன். அவரின் பேட்டிங்கைப் பார்க்கும்போது அற்புதமாக இருக்கும்.

Gary Kristen - கேரி கிர்ஸ்டன் — Gary Kristen – கேரி கிர்ஸ்டன்

அவரின் இத்தகைய கரியருக்கு பேடி அப்டனுக்கு (2011 உலகக் கோப்பை இந்திய அணியின் மனநிலை மற்றும் மூலோபாய தலைமைத்துவப் பயிற்சியாளர்) கிரெடிட் கொடுக்க வேண்டும்.

அந்த உலகக் கோப்பைக்கு யுவராஜைத் தயார்ப்படுத்த பேடி நிறைய உழைத்தார்” என்று கூறினார்.

2011 உலகக் கோப்பையில் ஆஸ்திரேலியாவுக்கெதிரான காலிறுதிப் போட்டியில் யுவராஜ் இரண்டு முக்கியமான விக்கெட்டுகள் வீழ்த்தியதுடன் சேஸிங்கில் அரைசதம் அடித்து கடைசிவரை நாட் அவுட் பேட்ஸ்மேனாக நின்று இந்தியாவை வெற்றிபெறவைத்தது அவரின் கிரிக்கெட் கரியரில் முக்கியமான ஆட்டமாக இருக்கிறது.