"என்னைச் சிரிக்கவும், சிந்திக்கவும், ரசிக்கவும் வைத்தது" – 'மாரீசன்' படத்தைப் பாராட்டிய கமல் ஹாசன்

சுதீஷ் சங்கர் இயக்கத்தில் வடிவேலு, பஹத் ஃபாசில் இணைந்து நடித்துள்ள ‘மாரீசன்’ திரைப்படம் வரும் ஜூலை 25ம் தேதி திரையரங்குகளில் வெளியாகிறது.

ஆர்.பி. சவுத்ரியின் சூப்பர் குட் ஃபிலிம்ஸ் இந்தப் படத்தைத் தயாரித்திருக்கிறது. யுவன் சங்கர் ராஜா இசையமைத்திருக்கிறார். இந்நிலையில் ‘மாரீசன்’ படத்தை முன்கூட்டியே பார்த்த நடிகர் கமல் ஹாசன் படத்தைப் பாராட்டிப் பதிவிட்டிருக்கிறார்.

அவர் வெளியிட்டிருக்கும் சமூக வலைத்தளப் பதிவில், “‘மாரீசன்’ படத்தைப் பார்த்தேன். இந்தப் படத்தில் நகைச்சுவையும், ஆழ்ந்த ஒரு விஷயமும் இணைந்திருக்கிறது. அது என்னைச் சிரிக்கவும், சிந்திக்கவும், அதன் கலையை ரசிக்கவும் வைத்தது. இந்த அற்புதமான படைப்பை வாழ்த்த படக்குழுவினருடன் ஒரு அற்புதமான உரையாடல் நடத்தினேன்.

இந்தப் படத்தில் நகைச்சுவை மட்டுமின்றி மனித உணர்வுகளைப் பற்றிய ஒரு சமூக அக்கறையுள்ள பார்வையும், நம் சமூகத்தின் இருண்ட நிழல்களை உற்று நோக்கும் ஒரு கூர்மையான பார்வையும் உள்ளன.

நான் ஒரு பார்வையாளராகவும், படைப்பாளியாகவும் இந்தப் படத்தினால் ஈர்க்கப்பட்டிருக்கிறேன்” என்று நெகிழ்ச்சியாகப் பாராட்டி இருக்கிறார்.