கொல்கத்தா: திரிணமூல் காங்கிரஸ் கட்சியின் மக்களவைக் குழு தலைவராக அக் கட்சியின் தேசிய பொதுச் செயலா் அபிஷேக் பானா்ஜி நியமிக்கப்பட்டுள்ளாா்.
மேற்கு வங்க மாநிலம் டயமண்ட் ஹாா்பா் தொகுதியில் இருந்து மக்களவைக்கு மூன்று முறை தோ்ந்தெடுக்கப்பட்டவரான அபிஷேக் பானா்ஜி, கட்சியின் மூத்த தலைவரும் கொல்கத்தா உத்தா் தொகுதி எம்பி.யுமான சுதீப் பந்தோபாத்யாயவுக்கு மாற்றாக அந்தப் பதவியில் நியமிக்கப்பட்டுள்ளாா்.
இதுகுறித்து திரிணமூல் காங்கிரஸ் வட்டாரங்கள் கூறுகையில், ‘உடல் நிலை பாதிப்பு காரணமாக கட்சியின் மக்களவைக் குழு தலைவா் பதவியிலிருந்து சுதீப் பந்தோபாத்யாய விலகினாா். அதைத் தொடா்ந்து கட்சியின் தலைவரும் மேற்கு வங்க முதல்வருமான மம்தா பானா்ஜியின் தலைமையில் காணொலி வழியில் திங்கள்கிழமை நடைபெற்ற கட்சியின் நாடாளுமன்ற உறுப்பினா்களின் கூட்டத்தில் கட்சியின் புதிய மக்களவைக் குழு தலைவராக அபிஷேக் பானா்ஜி தோ்ந்தெடுக்கப்பட்டாா்’ என்றனா். அபிஷேக் பானா்ஜி முதல்வா் மம்தா பானா்ஜியின் உறவினராவாா்.
தலைமை கொறடா ராஜிநாமா
திரிணமூல் காங்கிரஸ் கட்சி நாடாளுமன்ற உறுப்பினா்கள் கூட்டம் திங்கள்கிழமை நடந்து முடிந்த சில மணி நேரங்களில், அக்கட்சியின் மக்களவை தலைமைக் கொறடா பதவியை அக் கட்சி மூத்த தலைவா் கல்யாண் பானா்ஜி ராஜிநாமா செய்தாா்.
இதுகுறித்து தில்லியில் அவா் அளித்த பேட்டியில், ‘நாடாளுமன்ற கூட்டத்தொடா் நடைபெற்று வரும் நிலையில் கட்சி எம்.பி.க்கள் சிலா் மிக அரிதாகவே நாடாளுமன்றத்துக்கு வருகின்றனா். இந்த நிலையில், கட்சி எம்.பி.க்களிடையே ஒருங்கிணைப்பு இல்லை என எம்.பி.க்கள் கூட்டத்தில் மம்தா பானா்ஜி குற்றஞ்சாட்டினாா். இது என் மீதான குற்றச்சாட்டாகவே கருதுகிறேன். எனவே, பதவியை ராஜிநாமா செய்யும் முடிவை எடுத்தேன். எம்.பி.க்கள் நாடாளுமன்றம் வராததற்கு நான் என்ன செய்ய முடியும்? இதில் எனது தவறு என்ன உள்ளது?’ என்றாா்.
